कैलालीमा मोटरसाइकल दुर्घटनामा परि अछामका एक दम्पतीको मृत्यु भएको छ । पञ्चदेवल विनायक नगरपालिका–१ कुइकाका ३८ वर्षीय खगेन्द्र ढकाल  र उनकी श्रीमती ३५ वर्षीया मैसरा ढकालको मृत्यु भएको हो ।इलाका प्रहरी कार्यालय चिसापानीका अनुसार कैलालीको मोहन्याल गाउँपालिका –७ पितमारी नजिक ३ सय मिटर तल मोटरसाइकल खसेर घटनास्थलमा ज्यान गएको हो । प्रहरीका अनुसार टीकापुर अस्पतालले गएराति १२ बजेर ५५ मिनेटमा मृत घोषणा गरेको हो ।पारिवारिक स्रोतका अनुसार ढकाल दम्पती बर्दियाको भुरी गाउँमा रहेका छोराहरू भेट्नका लागि बुधबार बिहानै अछामबाट हिँडेका थिए । अछामको पूर्वी क्षेत्रमा विद्युतीय सामाग्रीको व्यापार गरिरहेका ढकाल दम्पती बर्दियामा पारिवारिक भेटघाट गरेर नेपालगन्जबाट पसलको सामान ल्याएर अछाम फर्किने योजना बनाएर गएका थिए ।भेरी प्राविधिक शिक्षालयमा विद्युतीय वायरिङ पढेका ढकाल मलेसियामा ३ वर्ष बसेर नेपाल फर्केका थिए । मलेसियामा गएर वायरिङ सम्बन्धी थप काम सिकेर उनले अछामको पूर्वी क्षेत्रमा त्यही सम्बन्धी काम गरिरहेको पारिवारिक स्रोतले जनाएको छ । मृतक दम्पतीका १५ र ११ वर्षका दुई छोरा छन् ।