वीरगन्जमा हैजाको संक्रमण फैलिएको दुई हप्ता बितिसक्दा पनि हैजाको श्रोत अझैसम्म पत्ता लाग्न सकेको छैन ।वीरगन्जमा पहिलो दिन भदौं ६ गते तीन जनामा हैजाको संक्रमण पुष्टि भएकोमा त्यसयता शुक्रबार बेलुकी सम्म १९२ जनामा हैजाको संक्रमण पुष्टि भइसकेको छ ।तर अहिलेसम्म हैजाको श्रोत भने पत्ता लाग्न सकेको छैन ।
स्वास्थ्य कार्यालय पर्सा,नेपाल खानेपानी संस्थान र वीरगन्ज महानगरपालिकाले संक्रमण प्रभावित क्षेत्रका पानीका धारा र घरहरुबाट खानेपानीको नमूना संकलन गरी परिक्षण गर्दै आइरहेका छन् ।तर ती परीक्षणमा हैजाको श्रोत अहिलेसम्म पत्ता लाग्न सकेको छैन ।
गत बुधबारमात्रै विश्व स्वास्थ्य संगठन (डब्लुएचओ) र स्वास्थ्य कार्यालय पर्साले वीरगन्जका शंकास्पद ११ स्थानबाट खानेपानीको नमूना संकलन गरी त्यसको गुणस्तर परीक्षण गरेकोमा चार ठाँउको पानीमा दिसाजन्य किटाणु ’इ–कोली’ भेटिएको छ । तर ती पानीमा हैजाको संक्रमण हुने ‘भिब्रियो कोलेरा’ किटाणु भने फेला परेन ।
गत बुधबार वीरगन्जस्थित युथ केयर फाउन्डेसनको रिह्याब सेन्टरको दुई वटा तथा स्वीकृति खाजाघर र स्वीट टी हाउसबाट संकलन गरिएका एक–एकवटा नमूनामा दिसाजन्य किटाणु ’इ–कोली’ भेटिएको पर्साका प्रमुख जिल्ला अधिकारी तोयनारायण सुवेदीले जानकारी दिए।तर त्यसमा हैजाको संक्रमण हुने भिब्रियो कोलेरा किटाणु भने नदेखिएको उनले बताए ।
यसअघि खानेपानी तथा ढल व्यवस्थापन विभागको टोलीले गत भदौ ८ गते १३ स्थान, भदौं ९ गते २५ स्थान र भदौं १० गते ५ स्थान गरी ४३ स्थानबाट डिप बोरिङ र खानेपानी संस्थानको धाराबाट पानीको नमूना संकलन गरेर पानीको गुणस्तर परीक्षण विभागको केन्द्रीय पानी परीक्षण प्रयोगशालामा परीक्षण गरेको थियो। शुक्रबार साँझ प्राप्त त्यसको रिपोर्टमा पनि दिसाजन्य किटाणु ’इ–कोली’ र हैजाको संक्रमण हुने ‘भिब्रियो कोलेरा’ दुवै किटाणु भने नदेखिएको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले जानकारी दिए ।
यस्तै भदौं १२ गते वीरगन्ज महानगरपालिकाको टोलीले वडा नम्बर १०, ११ र १२ का गरी ७ स्थानबाट डीप बोरिङ र खानेपानी संस्थानका धाराको पानीको नमूना महानगरकै खानेपानी प्रशोधन केन्द्रको प्रयोगशालामा परीक्षण गर्दापनि त्यसमा पनि हैजाको भिब्रियो कोलेरा वा दिसाजन्य किटाणु भेटिएन ।
गत भदौं १४ गते वीरगन्ज आएका गृहमन्त्री रमेश लेखकले वीरगन्जमा हैजाको संक्रमण छिट्टै पत्ता लगाउने दाबी गरेका थिए । अस्पतालहरुको अनुगमनपछि सरोकारवालाहरुसंगको छलफलमा उनले भनेका थिए,‘हैजाको संक्रमण फैलिनुको कारण पत्ता लगाउन सरकार लागि पर्छ ।यसको कारण नै के हो ? भनेर पत्ता लाग्न जरुरी छ । संक्रमण फैलिएको निक्कै दिन भइसक्दा पनि यसको कारण के हो ? अहिलेसम्म पत्ता लाग्न सकेको छैन ।अब हामी कारण पत्ता लगाउन पनि ध्यान दिन्छौ । त्यसका लागि सरकार लागी पर्छ ।’
तर गृहमन्त्री लेखकपनि वीरगन्जबाट फर्किएर गएको एक हप्ता बितिसक्दापनि हैजा फैलनुको कारण अर्थात हैजाको श्रोत पत्ता लाग्न सकेको छैन ।
स्वास्थ्य कार्यालय पर्साका जनस्वास्थ्य अधिकृत ठाकुरले भने,‘ प्रभावित क्षेत्रबाट पानीको नमूना संकलन गरेर विभिन्न प्रयोशगलामा परीक्षण गर्ने काम अझैपनि चलिरहेकै छ । तर अहिलेसम्मको परीक्षणमा पानीमा हैजाको संक्रमण हुने किटाणु भिब्रियो कोलेरा भने भेटिएको छैन ।केहिस्थानका पानीको नमूनामा परिक्षणमा दिसाजन्य किटाणु इ–कोली मात्रै भेटिएको छ ।’
के छ वीरगन्जको अवस्था ?
वीरगन्जमा हैजा संक्रमण नियन्त्रण उन्मुख रहेपनि यहाँका अस्पतालहरुमा झाडापखाला र हैजाका संक्रमित बिरामीहरु उपचारका लागि आउने क्रम जारी नै छ ।तर उक्त संख्या भने दिनहुँ घट्दो क्रममा रहेको छ ।
अस्पतालहरुमा झाडपखालाका नयाँ बिरामी र हैजा संक्रमण पुष्टि हुने बिरामी दुवैको संख्या घट्दै गएको स्वास्थ्य कार्यालय पर्साका जनस्वास्थ्य अधिकृत ठाकुरले बताए ।
अस्पतालमा शनिबार झाडापखालाका नयाँ बिरामी २१ जना मात्रै भर्ना भएको स्वास्थ्य कार्यालय पर्साले जनाएको छ ।तीमध्ये २ जनामा मात्रै हैजाको संक्रमण पुष्टि भएको स्वास्थ्य कार्यालय पर्साका जनस्वास्थ्य अधिकृत ठाकुरले जानकारी दिए।
वीरगन्जका विभिन्न अस्पतालमा उपचाररत झाडापखालाका सिकिस्त बिरामीहरुको आरडिटी किटबाट हैजाको परीक्षण हुदै आएको छ ।हालसम्म (भदौं ६ गते शनिबाार भदौं २१ गतेबिहानसम्म ) १९२ जनामा हैजाको संक्रमण पुष्टि भएको ठाकुरले जानकारी दिए । तीमध्ये १७५ जना निको भई अस्पतालबाट डिस्चार्ज भइसकेको र हाल अस्पतालमा १७ जनामात्रै उपचाररत रहेका छन् ।
यसैगरि हालसम्म (भदौं ६ देखि भदौं २१ गते बिहानसम्म ) कूल १ हजार ७५ जना झाडापखालाबाट संक्रमित भएकोमा तीमध्ये अस्पतालमा उपचारपछि निको भएर ९ सय ९१ जना घर फर्किसकेको ठाकुरले बताए । हाल विभिन्न अस्पतालमा गरी ८४ जनामात्रै झाडापखालाका बिरामी उपचाररत रहेको भन्दै उनले आइसियुमा उपचारत बिरामीको संख्या हाल १० मात्रै रहेको जानकारी गराए ।
